شو بتكذْبوا…شو بتكذْبوا…شو بتكذْبوا يا كبارْ!!!
قلْتولنا:
حلوة الدني يا صغارْ
نِيّالكُنْ!…
والعمرْ بعدو زرارْ
ناطركُنْ
ناموا…حلموا بقصورْ
ودنيةْ حلى وزهورْ
وأيامْ ملياني
خيرْ وسلامْ وحقّْ
وأفراحْ وغناني
لا ظلمْ فيها ولا طمعْ
ولا دياب ما بتخلصْ شَبَعْ
متلْ التلج بيضا ومعطّرةْ بسكّرْ
من لونْ بسمتكُنْ
من صَفوْ دمعتكُنْ
من زَهوْ عجْقتكُنْ
من طهركُنْ
من خوفكُنْ
من كل براءتكُنْ
هيكْ الدني
نيّالكُنْ يا صغارْ!…
*****
ناموا…حلموا…تاتشبعوا
وفيقوا الصبحْ بكّيرْ
عا ريحة العنبرْ
عا شمسْ عمْ تكبَرْ
شوفوا القمرْ أحلى
بِأرضْ عمْ تحلى
كلْ الدني إلكُنْ
كل الحلى منكُنْ
كل الحكي عنكُنْ
نيّالكُنْ يا صغارْ
*****
قلْتولنا يا كبارْ
هيدا الحكي مراتْ
ونحنا
لانّا صغارْ
وما منعرفْ الكذبةْ
سمعنا الحكيْ
واللِي حِكي
ونمنا بحلمْ كبيرْ
حتى يجي بُكره
*****
ولمّا إجا بُكره
وبعد بعدو بكم سنة بُكره
لا قصورْ شِفْنا ولا حلى ولا زهورْ
ولا شمسْ عمْ بتدورْ
ولا زقزقةْ عصفورْ
*****
شِفْنا القمرْ ختيارْ
شِفْنا العمرْ قَهّارْ
شِفْنا الظلمْ دوّارْ
شِفْنا البحرْ غدّارْ
خاطِفْ أهالينا
شِفْنا القتلْ
شِفْنا الدني حمرا
والليلْ حالكْ من كِترْ طولُو
ما عادْ عندو نهارْ
*****
تاري الحكي مكَّارْ
تاري الحِكي ثرثارْ
كلْ الحَكي الْقْلتوه
كذّبْ علينا وطارْ
تَيْنيّمْ الحلوينْ ويسرقْ تلاوينْ
ويسرقْ تلاحين من بُكره
*****
لأَيمتى يا كبارْ
تَتْنيّموا لِصغارْ
بتحْكوا كلامْ كبيرْ
وبتألّفوا أخبارْ؟
حاجي بَقَى يا كبارْ
حاجي طمعْ
اخدتوا العمرْ كلُّو
اخدتوا مبارِحْ وأولْ مبارِحْ ومنْ زمانْ كتيرْ
كلّْ اللمرقْ
كلّو احترقْ بسلالكُنْ
خَلّولنا بُكرهْ
خَلّولنا شَقْفِة سَما
خَلّولنا كَمشةْ هوا
خَلّولنا نجمة
خَلّولنا صخرة
خَلّولنا حَجرة تَنبني بيتنا
من غير هالطينة
ومن غير هالزينة
خَلّولنا نتفةْ وطنْ
خَلّولنا شَرْقة زمنْ
حاجي بقا يا كبارْ
بيكفّي
صغارْ الدني كِبروا
من حقهمْ كلمة
من حقّهمْ نسمة
من حقّهمْ مَطرحْ
حاجي بقا يا كبارْ
صغارْ الدني كِبروا
وما عادْ فيها صغارْ
تا تكذبوا عليهُمْ!…
صغارْ الوطنْ يا “صغارْ”
تا يخلْقوا بُكره
عا قدْ أمانيهمْ
صاروا غضبْ ثُوّارْ
**********